Զելենսկին պարզունակ է անվանել Ղրիմը և Դոնբասը Ռուսաստանին զիջելու գաղափարը

Ուկրաինայի նախագահ Վլադիմիր Զելենսկին հայտարարել է, որ հակամարտության խաղաղ կարգավորման գաղափարը, որի դեպքում երկիրը Ղրիմն ու Դոնբասը թողնում է Ռուսաստանի վերահսկողության տակ, «շատ պարզունակ է»։ Աղբյուրները The Washington Post-ին հայտնել են, որ ԱՄՆ նախկին նախագահ Դոնալդ Թրամփը դիտարկում է նմանատիպ ծրագիր:

«Եթե Թրամփն իսկապես ունի իր մոտեցումը պատերազմն արագ ավարտելու հարցում, ապա ես շատ ուրախ կլինեմ լսել այս գաղափարը։ Բայց մեզ ամուր փաստարկներ են պետք։ Մեզ ոչ թե ֆանտաստիկ գաղափար է պետք, այլ իրական։ Մենք խոսում ենք մարդկային կյանքերի մասին, մենք չենք կարող կատակել և ռիսկի դիմել»,- ասել է Զելենսկին Bild-ին տված հարցազրույցում։

Վլադիմիր Զելենսկին հավելել է, որ Ուկրաինայի իշխանությունները մասնավոր և հրապարակային հրավիրել են Դոնալդ Թրամփին Ուկրաինա, «որ նա կարողանա իր աչքերով տեսնել իրավիճակը և որոշակի եզրակացություններ անել»։ «Ես միանշանակ պատրաստ եմ հանդիպել նրան»,- հավելել է Զելենսկին։

Ըստ WP-ի՝ Դոնալդ Թրամփը մասնավոր զրույցներում խոստովանել է, որ կարող է վերջ դնել Ուկրաինայում ռազմական հակամարտությանը՝ ստիպելով Ուկրաինայի իշխանություններին գնալ տարածքային զիջումների՝ թողնելով Ղրիմը և Դոնբասը Ռուսաստանի վերահսկողության տակ։ Թրամփի նախընտրական շտաբն այս տեղեկությունը կեղծ է անվանել։