Ֆրանսիայի շահերից չի բխում քննարկումներ անցկացնել ՌԴ ներկայացուցիչների հետ․ երկրի ԱԳ նախարար

Ֆրանսիայի համար այժմ նպատակահարմար չէ բանակցություններ վարել Ռուսաստանի ներկայացուցիչների հետ, քանի որ կոմյունիկեները, որոնք հրապարակում է ռուսական կողմը, ոչ հավաստի տեղեկատվություն են պարունակում: Նման հայտարարությամբ է հանդես եկել Ֆրանսիայի ԱԳ նախարար Ստեֆան Սեժուրնեն France 24 հեռուստաալիքի եթերում։

ԱԳ նախարարը հիշեցրել է, որ Ֆրանսիան և Ռուսաստանը «ահաբեկչության դեմ պայքարում համագործակցության երկար պատմություն ունեն»: Միաժամանակ նա հայտարարել է, որ «այսօր Ֆրանսիայի շահերից չի բխում քննարկումներ անցկացնել Ռուսաստանի ներկայացուցիչների հետ, քանի որ բանակցությունների արդյունքների վերաբերյալ նրանց կոմյունիկեն կեղծ է»: Սեժուրնեի խոսքով՝ նախքան քննարկումները, «անհրաժեշտ է վերականգնել վստահությունը»:

Ապրիլի 3-ին Ռուսաստանի պաշտպանության նախարար Սերգեյ Շոյգուն և Ֆրանսիայի զինված ուժերի նախարար Սեբաստիան Լեկորնյուն առաջին հեռախոսազրույցն են ունեցել 2022 թվականի հոկտեմբերից ի վեր։ Նախարարները քննարկել են Մերձմոսկվայում տեղի ունեցած ահաբեկչությունը և Ուկրաինայի հարցով բանակցությունները։ Շոյգուն իր գործընկերոջը հայտնել է, որ Մոսկվան հույս ունի, որ ահաբեկչության հետևում «ֆրանսիական հատուկ ծառայությունները կանգնած չեն»: Մեկնաբանելով Ելիսեյան պալատի հայտարարությունները Ուկրաինա ֆրանսիական զորախումբ ուղարկելու հնարավորության մասին՝ Շոյգուն նշել է, որ «գործնական իրականացման դեպքում դա խնդիրներ կստեղծի հենց Ֆրանսիայի համար»: