Գազայի խաղաղության բանակցություններում առաջընթաց է գրանցվել
Գազայի հատվածում հրադադարի շուրջ Կահիրեում անցկացված բանակցությունների ընթացքում առաջընթաց է գրանցվել, կողմերը համաձայնության են եկել հիմնական կետերի շուրջ, երկուշաբթի հաղորդում է Եգիպտոսի պետական Al-Kahera հեռուստաալիքը՝ վկայակոչելով իրազեկ աղբյուրը։
Կիրակի Կահիրեում բանակցություններ են տեղի ունեցել Եգիպտոսի, Քաթարի, ԱՄՆ-ի, Իսրայելի և ՀԱՄԱՍ-ի ներկայացուցիչների մասնակցությամբ։ Միաժամանակ հեռուստաալիքը նշում է, որ մինչ այժմ նրանցից ոչ մեկը պաշտոնապես չի հաստատել քննարկման առաջընթացի մասին հաղորդումը։
Ըստ Al-Kahera–ի, ՀԱՄԱՍ-ի և Քաթարի պատվիրակությունները լքել են Կահիրեն և կվերադառնան երկու օրվա ընթացքում՝ բանակցելու վերջնական համաձայնագրի պայմանների շուրջ, իսկ Իսրայելի և ԱՄՆ-ի պատվիրակությունները մի քանի ժամվա ընթացքում կլքեն Եգիպտոսի մայրաքաղաքը:
Իսրայելական Jerusalem Post թերթը հաղորդում է, որ կիրակի ՀԱՄԱՍ-ը կրկնել է համաձայնագրի իր պահանջները՝ մշտական զինադադար, իսրայելական զորքերի դուրսբերում Գազայից, տեղահանվածների վերադարձ և պաղեստինցի գերիների փոխանակում Գազայում պահվող իսրայելցի պատանդների հետ:
