Ֆրանսիան «օգտակար տեղեկատվություն» ունի «Կրոկուս»–ի ահաբեկչության մասին. Մակրոն
Ֆրանսիայի նախագահ Էմանուել Մակրոնը հայտարարել է, որ ինքը «օգտակար տեղեկատվություն» ունի «Կրոկուս»–ում տեղի ունեցած ահաբեկչության մասին, և երկրի պաշտպանության նախարար Սեբաստյան Լեկորնուն պատրաստ է կիսվել դրանով իր ռուս գործընկեր Սերգեյ Շոյգուի հետ զրույցում, հաղորդում է France 24 հեռուստաալիքը։ Ինչպես նշել է ֆրանսիացի առաջնորդը, ռուսական կողմը «ծիծաղելիորեն» չի բացառել հարձակմանը արևմտյան երկրների հնարավոր մասնակցությունը։
Փարիզի մերձակայքում գտնվող ջրային սպորտի օլիմպիական կենտրոնի բացման արարողության ժամանակ Էմանուել Մակրոնը մեկնաբանել է Ռուսաստանի և Ֆրանսիայի պաշտպանության նախարարներ Սերգեյ Շոյգուի և Սեբաստյան Լեկորնուի հեռախոսազրույցները, որոնք տեղի են ունեցել մեկ օր առաջ՝ ապրիլի 3-ին։ Ֆրանսիայի ղեկավարն ասել է, որ զրույցի պատճառը հենց Փարիզի ցանկությունն է՝ կիսվել ահաբեկչության մասին որոշ տեղեկություններով, որոնք հասանելի են դարձել ֆրանսիական հետախուզական ծառայություններին։
Սակայն, Մակրոնի խոսքերով, Շոյգուի հայտարարությունները հնչել են «ուռճացված և սպառնալից, և դրանում ոչ մի նոր բան չկա»։
Ֆրանսիայի նախագահը նաև նշել է, որ ռուսական համերգասրահում տեղի ունեցած ահաբեկչությանը Կիևի և հատկապես Փարիզի մասնակցության մասին ենթադրությունները «չեն համապատասխանում իրականությանը և անիմաստ են»։
