Բլինքենն ու Ալիևը քննարկել են ԱՄՆ-ԵՄ-ՀՀ առաջիկա հանդիպումը

Ապրիլի 3-ին ԱՄՆ պետքարտուղար Էնթոնի Բլինքենը զանգահարել է Ադրբեջանի Հանրապետության նախագահ Իլհամ Ալիևին։

 Բլինքենն ասել է, որ տեղեկություն է ստացել ադրբեջանական կողմի մտահոգությունների մասին, որոնք առաջացել են ապրիլի 5-ին ԱՄՆ-ի, Եվրամիության և Հայաստանի միջև կայանալիք եռակողմ հանդիպման կապակցությամբ և նշել, որ կարևոր է համարում այդ մասին խոսել նախագահ Իլհամ Ալիևի հետ և պարզաբանել հարցը։

 Պետքարտուղարն ընդգծել է, որ նշված հանդիպման նշանակությունը լինելու է Հայաստանի տնտեսական զարգացման հարցերը։

 Նախագահ Իլհամ Ալիևն ասել է, որ, իր տեղեկություններով, եռակողմ հանդիպման նախապատրաստման գործընթացում քննարկվել են այնպիսի հարցեր, ինչպիսիք են Հայաստանին ռազմական օգնությունը և համատեղ զորավարժությունները, Ադրբեջանին սահմանակից տարածքներում ռազմական ենթակառուցվածքների ստեղծումը, Հայաստանի սպառազինումը ԵՄ Եվրոպական Խաղաղության հիմնադրամի գծով և ԱՄՆ բյուջեի հաշվին։

 Էնթոնի Բլինքենը նշել է, որ ապրիլի 5-ի հանդիպումն ուղղված չէ Ադրբեջանի դեմ։

 Զրույցի ընթացքում քննարկվել են Հայաստանի և Ադրբեջանի միջև խաղաղության բանակցությունները։ Իլհամ Ալիևն ասել է, որ խաղաղության պայմանագրի տեքստի շուրջ Բեռլինում կայացած ԱԳ նախարարների բանակցություններն օգտակար են եղել գործընթացն առաջ մղելու առումով, և անհրաժեշտություն կա արագացնել բանակցությունները։

 Երկրի ղեկավարն ընդգծել է նաև, որ ամբողջովին անհիմն են այն մեղադրանքները, որոնք հնչում են Արևմուտքում, թե Ադրբեջանը մտադիր է հարձակվել Հայաստանի վրա։

 Ալիևն ընդգծել է, որ Ադրբեջանը հավատարիմ է 2022 թվականին Պրահայի հանդիպման ժամանակ ընդունված հայտարարությանը և Ալմա-Աթայի հայտարարությանը։