Թայվանում տեղի ունեցած հզոր երկրաշարժի զոհերի թիվը հասել է չորսի

Թայվանում տեղի ունեցած երկրաշարժի զոհերի թիվը հասել է չորսի։ Այս մասին հայտնում է China Times թերթը՝ հղում անելով հրշեջ ծառայությանը։

Տարերային աղետի հետևանքով տուժել է 97 մարդ, նշել է հրատարակությունը։ Մինչ այս՝ կղզու կենտրոնական օդերեւութաբանական վարչության ղեկավար Ու Ցզյանֆուն հայտարարել էր, որ Թայվանում տեղի ունեցած երկրաշարժն ամենահզորն էր 1999 թվականի սեպտեմբերի 21-ից ի վեր։ Նրա խոսքով՝ ցնցումները զգացվել են ամբողջ Թայվանում, այդ թվում՝ կենտրոնական և հյուսիսային հատվածներում։

Նշվում է, որ 25 տարի առաջ Թայվանի Ջիջի քաղաքում 7,3 մագնիտուդով երկրաշարժ էր տեղի ունեցել, որի հետևանքով տուժել էր ավելի քան 11 հազար մարդ։