Սի Ծինփինը և Բայդենը հեռախոսազրույց են ունեցել. հայտնի է՝ ինչ են քննարկել

Չինաստանի նախագահ Սի Ծինփինը հեռախոսազրույց է ունեցել ԱՄՆ նախագահ Ջո Բայդենի հետ, հայտնում է Global Times-ը։ Չինական լրատվամիջոցների փոխանցմամբ՝ առաջնորդները քննարկել են, մասնավորապես, երկկողմ հարաբերությունները։

Ամերիկյան լրատվամիջոցները, վկայակոչելով ԱՄՆ վարչակազմի անանուն ներկայացուցչին, հայտնում են, որ Սի Ծինփինը և Բայդենը զրույցի ընթացքում անդրադարձել են Ուկրաինայում տիրող իրավիճակին և Թայվանի թեմային։

Բացի այդ, նրանք քննարկել են «արհեստական ​​ինտելեկտի զարգացման հետ կապված ռիսկերը», ինչպես նաև կիբերտարածության անվտանգությունը:

Associated Press-ը նաև նշում է, որ Բայդենը հեռախոսազրույցում բարձրացրել է «Ռուսաստանի հետ Չինաստանի պաշտպանական հարաբերությունների» թեման և «Պեկինին կոչ է արել օգտագործել իր ազդեցությունը ԿԺԴՀ-ի վրա»՝ Փհենյանին զսպելու համար։

ԱՄՆ պետքարտուղար Էնթոնի Բլինքենը և ԱՄՆ ֆինանսների նախարար Ջանեթ Յելենը առաջիկա շաբաթներին կայցելեն Չինաստան, հայտնում են ամերիկյան լրատվամիջոցները։

Associated Press-ն իր հերթին նշում է, որ սա Սի Ծինփինի և Բայդենի առաջին խոսակցությունն էր անցյալ տարվա նոյեմբերից ի վեր, երբ առաջնորդները բանակցություններ էին վարում Կալիֆորնիայում։