Պերուի նախագահի տան խուզարկություններից հետո վեց նախարար հրաժարական է տվել
Պերուի կառավարության վեց նախարարներ հրաժարական են տվել այն բանից հետո, երբ Պերուի նախագահ Դինա Բոլուարտեի տունն ու նստավայրը խուզարկվել են ապօրինի հարստացման կասկածանքով հետաքննության շրջանակներում, նշում է Reuters-ը։
Ապրիլի 1-ին Պերուի ներքին գործերի նախարար Վիկտոր Տորեսը հրաժարական տվեց, որին հաջորդեցին կրթության և կանանց հարցերի նախարարները։ Երեքն էլ հանդես են եկել ի պաշտպանություն տիկին Բոլուարտեի: Նախարարները նախագահական նստավայրի խուզարկություններն անվանել են «ավելորդ» և «չափազանց», հաղորդում է գործակալությունը։ Պերուի նախագահի նստավայրը գտնվում է Կառավարական պալատի ներսում։ Տորեսն ընդգծել է, որ լքում է պաշտոնը ընտանեկան և առողջական խնդիրների պատճառներով։ Կառավարության ևս երկու անդամներ չեն ներկայացրել իրենց հրաժարականի պատճառները։
Նույն օրը ավելի ուշ Պերուի նախագահը պաշտոնանկ արեց ևս երեք նախարարների՝ արտադրության, առևտրի և գյուղատնտեսության։ Բոլուարտեն ներքին գործերի նոր նախարար է նշանակել Վալտեր Օրտիսին, ով նախկինում ղեկավարում էր կազմակերպված հանցավորության դեմ պայքարի վարչությունը։
