ՌԴ ԱԳՆ-ն Ուկրաինայից պահանջել է ձերբակալել ՈՒԱԾ–ի ղեկավար Մալյուկին

ՌԴ ԱԳՆ-ն հայտարարել է, որ ռուսական կողմի կողմից իրականացված քննչական գործողությունները վկայում են Ուկրաինայի և Ռուսաստանի Դաշնության տարածքում ահաբեկչական գործողությունների, այդ թվում՝ «Կրոկուս Սիթի Հոլլում» ահաբեկչության միջև կապի մասին։ Այս կապակցությամբ գերատեսչությունը Ուկրաինայի իշխանություններին պահանջներ է ներկայացրել Ուկրաինայի անվտանգության ծառայության (ՈՒԱԾ) ղեկավար Վասիլ Մալյուկին և ներգրավված այլ անձանց ձերբակալելու վերաբերյալ։

«Ռուսաստանի արտաքին գործերի նախարարությունը Ուկրաինայի իշխանություններին է փոխանցել «Ահաբեկչական պայթյունների դեմ պայքարի միջազգային կոնվենցիայի» (ICBT) և «Ահաբեկչության ֆինանսավորման դեմ պայքարի միջազգային կոնվենցիայի» (ICFT) շրջանակներում այս ահաբեկչություններին ներգրավված բոլոր անձանց անհապաղ ձերբակալման և արտահանձնման պահանջները»,- ասված է ՌԴ ԱԳՆ հայտարարության մեջ։

Վասիլի Մալյուկը, ըստ ԱԳՆ հայտարարության, «ցինիկաբար խոստովանել է», որ Ուկրաինան կազմակերպել է Ղրիմի կամրջի ռմբակոծումը 2022 թվականի հոկտեմբերին, ինչպես նաև բացահայտել է Ռուսաստանի տարածքում այլ ահաբեկչությունների նախապատրաստման մանրամասներ։ ԱԳՆ-ն Ուկրաինայից պահանջում է «դադարեցնել ցանկացած աջակցություն ահաբեկչական գործողություններին, հանձնել մեղավորներին և փոխհատուցել տուժածներին պատճառված վնասը»։

«Կրոկուս Սիթի Հոլլում» ահաբեկչությունը տեղի է ունեցել մարտի 22-ին. կամուֆլյաժով մի խումբ տղամարդիկ ներխուժել են համերգասրահ, կրակ բացել և այրել շենքը։ Ռուսաստանի Քննչական կոմիտեն, վկայակոչելով ձերբակալվածների ցուցմունքները, հայտնել է, որ ահաբեկչության հեղինակները հարձակումից հետո Կիևում պետք է պարգև ստանային։ Ուկրաինայի իշխանությունները հերքում են միջադեպին առնչությունը։