ԱՄՆ-ն թույլատրել է կործանիչների և ռմբակոծիչների փոխանցումն Իսրայելին
Միացյալ Նահանգներն արտոնել է Իսրայելին «միլիարդավոր դոլարների» կործանիչների եւ ռումբերի փոխանցումը՝ չնայած Գազայի հատվածի հարավում Ռաֆահում գործողության հետ կապված մտավախություններին: Այս մասին գրում է Washington Post պարբերականը՝ հղում անելով իր աղբյուրներին։
«ԱՄՆ նախագահ Ջո Բայդենի վարչակազմը վերջին օրերին թույլատրել է միլիարդավոր դոլարների ռումբերի եւ կործանիչների փոխանցումն Իսրայելին՝ չնայած Վաշինգտոնի մտավախություններին Գազայի հարավում սպասվող ռազմական հարձակման կապակցությամբ», — գրում են լրագրողները:
Միևնույն ժամանակ, հոդվածի հեղինակները նշում են, որ, որոշ դեմոկրատների կարծիքով, ԱՄՆ կառավարությունը պետք է զերծ մնա զենքի մատակարարումից Իսրայելի պարտավորությունների բացակայության պայմաններում, որպեսզի պաշտպանի քաղաքացիական բնակչությանը Ռաֆահում պլանավորված գործողության ընթացքում:
Մինչ այդ ԱՄՆ Պետդեպարտամենտի ներկայացուցիչ Մեթյու Միլլերը հայտարարել էր, որ Ռաֆահում Իսրայելի ռազմական գործողությունը կհանգեցնի երկրի էլ ավելի մեկուսացմանը միջազգային ասպարեզում, դրանից երես կթեքեն վաղեմի գործընկերները:
