Թուրքիան պատրաստվում է ռազմական գործողություններ սկսել․ ԶԼՄ

Թուրքիան հայտարարել է, որ պատրաստվում է լայնածավալ ռազմական գործողություններ սկսել Իրաքում գործող քուրդ ապստամբների դեմ։ Էրդողանը խոստացել է «վերջ տալ» քրդական ապստամբ խմբավորումից բխող սպառնալիքին։ Այս մասին գրում է «Ամերիկայի ձայնը»։

Տարիներ է, ինչ թուրքական զինված ուժերը ներխուժումներ են իրականացնում հարևան Հյուսիսային Իրաք՝ գրոհելով «Քուրդիստանի բանվորական կուսակցության»՝ քրդական ապստամբ խմբավորման հենակետերը։ Խմբավորումը տասնամյակներ շարունակ պայքարում է Թուրքիայում քրդերի իրավունքների պաշտպանության համար։

Թուրքիայի նախագահ Ռեջեփ Թայիփ Էրդողանը խոստացել է «վերջ տալ» «Քուրդիստանի բանվորական կուսակցությունից» բխող սպառնալիքին:

«Ակնկալվում է, որ Իրաքի սահմանային շրջաններում Թուրքիան կստեղծի 40 կիլոմետրանոց նոր անվտանգության գոտի, որը նման կլինի Սիրիայում գոյություն ունեցողին»,- հայտարարել է Թուրքիայի նախագահի խորհրդական Մեսութ Կասինը։

Զուգահեռաբար՝ Էրդողանը սերտ կապեր է ստեղծել Իրաքի կիսաինքնավար՝ Քուրդիստանի տարածաշրջանային կառավարության ղեկավարության հետ։ Դիտորդների խոսքով, Անկարայի տեսանկյունից նման համագործակցությունը կարևոր նշանակություն ունի՝ «Քուրդիստանի բանվորական կուսակցությունից» բխող սպառնալիքը չեզոքացնելու համար:

Վերլուծաբան Մուրատ Ասլանն ասում է․ «Թուրքիան փորձելու է գործակցել Իրաքի անվտանգության ուժերի հետ: Թուրքիան ցանկանում է շրջափակել, հետո՝ ոչնչացնել Իրաքում գործող «Քուրդիստանի բանվորական կուսակցության» բոլոր անդամներին»։

Այս ապրիլին նախատեսվում է Էրդողանի այցը իրաքյան Քուրդիստան և Բաղդադ: Դիտորդների խոսքով, ընդլայնված երկկողմ առևտուրը, ինչպես նաև Իրաքով ու Թուրքիայով անցնող միջազգային առևտրի ավելացումը Էրդողանին նոր լծակներ են տալիս:

Մանրամասները՝ սկզբնաղբյուր կայքում։