2023թ. ՀՀ ԶՈւ-ն մի քանի անգամ բերվել է մարտական պատրաստվածության վիճակի. Պապիկյան

Անվտանգության մասով Հայաստանի շուրջ ստեղծված իրավիճակից ելնելով՝ 2023 թվականը բավական բարդ էր հանրապետության ՊՆ-ի եւ Զինված ուժերի համար։ Այս մասին Ազգային ժողովում, պաշտպանության եւ անվտանգության խորհրդարանական մշտական հանձնաժողովի արտահերթ նիստում, կառավարության ծրագրի (2021-2026թթ.) 2023թ. կատարողականի հաշվետվության քննարկման ժամանակ, մարտի 25-ին ասել է պաշտպանության նախարար Սուրեն Պապիկյանը։

Նրա խոսքով՝ ԶՈւ-ն տարվա ընթացքում գտնվել է մարտական պատրաստվածության տարբեր փուլերում։ Կառավարման մարմիններն աշխատել են ուժեղացված կարգով։ «Իրավիճակի սրման հետ կապված՝ 2023թ. մայիսին եւ սեպտեմբերին Զինված ուժերը բերվել են տարբեր աստիճանի մարտական պատրաստվածության։ Մարտական հերթապահությունը եւ ծառայությունը բարձր մարտական պատրաստվածության պայմաններում իրականացվել են Զնված ուժերի պոտենցիալի վերականգնմանը, ինչպես նաեւ վերակազմակերպմանն ու կոմպլեկտավորմանը զուգահեռ, որը հիմնականում իրականացվել է քաղած դասերի եւ միջազգային չափորոշիչների կիրառման հաշվառմամբ»,- նշել է Պապիկյանը։