ՏԵՍԱՆՅՈՒԹ․ Խոսակցություն կա ճանապարհը փոխելու մասին. Նոյեմբերյանի փոխքաղաքապետ

Խոսքն ադրբեջանական 4 գյուղերի մասին է, որոնք մեր տիրապետության տակ են գտնվում: Մենք մեր գյուղացիների հետ միասին ձևակերպել ենք մեր պահանջը: Սահամանազատումն այնպես, ինչպես պատկերացնում ենք մենք և Ադրբեջանը, կենսական խնդիրներ կառաջացնի և´ Ոսկեպար գյուղի, և´ ընդհանրապես Հայաստանի համար: Մենք պայմանավորվածություն ենք ձեռք բերել Կառավարության հետ՝ համայնքից աշխատանքային խումբ ստեղծել և մասնակցել սահմանագծման և սահմանազատման հանձնաժողովների աշխատանքներին: Այս մասին այսօր՝ մարտի 22-ին, NEWS.am-ի հետ զրույցում ասաց Նոյեմբերյանի փոխքաղաքապետ Մհեր Աղամյանը:

Նրա խոսքով՝ վարչապետը գյուղացիներին խոստացել է հաշվի առնել նրանց պահանջները և լուծումներ գտնել դրանց համար:

«Նման հարցերը 3 կամ 5 օրում չեն լուծվում, բանակցություններ են ընթանում: Պահանջները կձևակերպվեն և պատասխանի դեպքում մեզ կտեղեկացնեն: Դա կարող է լինել 6 ամիս, 7 ամիս, կամ 1 տարի հետո: Հստակ չգիտեմ»,-ասաց Մհեր Աղայանը՝ պատասխանելով հարցին, թե Կառավարությունը ի՞նչ ժամկետներում է խոստացել գյուղացիների պահանջները կատարել: 

Նոյեմբերյանի փոխքաղաքապետը դժվարացավ պատասխանել հարցին, թե կխարխլի արդյո՞ք գյուղերի տարածքների հանձնումը մեր պաշտպանական գիծը, պարզաբանելով, որ ռազմական մասնագետ չէ: Սակայն կրկին շեշտեց, որ տարածքների հանձնումը անվտանգության հետ կապված խնդիրներ է առաջացնելու Ոսկեպար գյուղի բնակիչների համար:

«Դա հանրապետական նշանակության ճանապարհ է, իհարկե, խնդիրներ կարող են առաջանալ: Խոսակցություն կա ճանապարհը փոխելու մասին: Բայց դե դա մի քանի օրում լուծվող հարց չէ, երկար ժամանակ է պետք»,-հավելեց Մհեր Աղամյանը: