Ընդդիմությունն, ըստ անհրաժեշտության, փողոցային գործողությունների է դիմելու

ԱԺ «Հայաստան» խմբակցության ղեկավար Սեյրան Օհանյանը հայտարարել է, որ ընդդիմությունը ողջ գործիքակազմն օգտագործելու է ԱԺ-ում և ԱԺ-ից դուրս։

Նրա խոսքով՝ ԱԺ-ից դուրս աշխատանքներ են տանելու իրենց համակիրների ու քաղաքացիների հետ, նաև, ըստ անհրաժեշտության, փողոցային գործողությունների են դիմելու։

«Նրանց հեռացնելու պայմաններից մեկը ԱԺ-ից դուրս ժողովրդական լայն համախմբումն է, և կոչ կանեի՝ ընդդիմադիր ամբողջ հատվածը, բոլոր քաղաքական ուժերը գտնեն համագործակցության եզրեր, ճիշտ գնահատեն ստեղծված իրավիճակը և իրենց գործունեությունը շարունակեն»,-ասել է Օհանյանը։

Սեյրան Օհանյանը հավելել է նաև, որ վաղն այցելելու է սահմանամերձ բնակավայրեր։

«Վաղը ինքս այցելելու եմ սահմանամերձ բնակավայրեր, մենք ուշադրության կենտրոնում ենք պահում այդ հարցերը, մեր սահմանամերձ բնակավայրերի բնակիչների կողքին ենք»,- մանրամասնեց պատգամավորը։