Ուկրաինան կարող է շատ արագ ընկնել․ Մակրոն

Ֆրանսիայի նախագահ Էմանուել Մակրոնը կարծում է, որ Ուկրաինայի անկումը կարող է շատ շուտով տեղի ունենալ: Այս մասին հայտնում է Politico թերթի եվրոպական հրատարակությունը՝ հղում անելով իր աղբյուրներին։ Տեղեկությունը փոխանցում է ՏԱՍՍ-ը։

Նրա տվյալներով՝ նախօրեին Մակրոնը Ելիսեյան պալատում քաղաքական միջոցառում է անցկացրել, որտեղ նաեւ քննարկվել Է Եվրախորհրդարանի առաջիկա ընտրությունների հարցը:

«Ուկրաինան կարող է շատ արագ ընկնել», - միջոցառման ընթացքում ասել է Մակրոնը: Նախագահի խոսքը պարբերականի հետ զրույցում փոխանցել է հանդիպման մասնակիցներից մեկը։

Ավելի վաղ Չեխիայի նախագահ Պյոտր Պավելի հետ մամուլի ասուլիսի ժամանակ Մակրոնը հայտնել էր, որ Եվրոպայի երկրները չպետք է սահմանափակումներ մտցնեն իրենց վրա՝ խոսելով Ուկրաինային օգնելու մասին, որպեսզի թույլ չտան պարտվողական տրամադրությունների տարածումը: Այս ֆոնին Մակրոնն ընդգծել է Ուկրաինայի համար ռազմական օգնության ապահովման կարեւորությունը եւ աջակցություն է հայտնել Եվրամիության սահմաններից դուրս երրորդ երկրներից հրետանային արկեր գնելու Չեխիայի նախաձեռնությանը:

Փետրվարի 26-ին Ուկրաինային նվիրված խորհրդաժողովի արդյունքներով, որն անցկացվել Է Փարիզում, Մակրոնը միանշանակ չի բացառել արեւմտյան երկրների ցամաքային զորքեր հատուկ ռազմական գործողության անցկացման գոտի ուղարկելու հնարավորությունը: Ֆրանսիայի նախագահը նաև հայտարարել է, որ Արևմուտքի պետությունները «մտադիր են անել այն ամենը, ինչ անհրաժեշտ է», որպեսզի Ռուսաստանը չկարողանա հաղթել այս հակամարտությունում: Մարտի 17-ին Le Parisien թերթին տված հարցազրույցում Մակրոնը հայտարարել է, որ որոշակի պահի կարող է անհրաժեշտ լինել ցամաքային գործողություններ իրականացնել ՝ «Ուկրաինայում ռուսական ուժերին դիմակայելու համար»: