Ինչո՞ւ է Ադրբեջանը հրաժարվում իր զորքերը դուրս հանել ՀՀ տարածքից․ հարց՝ Քոչարյանին

Երեկ փորձագետի շորեր հագած ընդդիմադիր դաշտի ներկայացուցիչները նախկին վարչապետի գլխավորությամբ՝ գնացել, կանգնել էին ինչ-որ սարի փեշին և խոսում էին Հայաստանի կործանումից։ Այս մասին ԱԺ ճեպազրույցների ժամանակ ասաց ՔՊ պատգամավոր Անդրանիկ Քոչարյանը։

Նրա խոսքով՝ եթե նրանք մտահոգված են մեր սահմանների անառիկությամբ, ապա պետք է իրենց անձնական ներդրումն անեն մեր երկրի անվտանգային համակարգն ուժեղացնելու և անխոցելի դարձնելու հարցում։

«Այլ ոչ թե վախեր տարածել, հնչեցնել բաներ, որոնք գոյություն չունեն։ Թուլացնելով իշխանության քայլերը ինչի՞ եք ձգտում»,- հավելեց նա։

Ըստ Քոչարյանի՝ հատվածական մոտեցումներով կարելի է գնալ խնդրի վերջնական լուծմանը։

Հարցին՝ եթե միակողմանի չեն զիջումները, ապա ինչո՞ւ է Ադրբեջանը հրաժարվում իր զորքերը դուրս հանել ՀՀ տարածքից՝ պատգամավորը նշեց.«Առայժմ է հրաժարվում։ Պետք է գնալ լուծումների, որպեսզի Ադրբեջանը չհրաժարվի։ Այդ հարցի շուրջ պետք է լիակատար կոնսենսուս ունենանք։ Պետության խնդիրն է անվտանգային միջավայր ստեղծել հարևան երկրների հետ»։