Ադրբեջանի բանակի և Թուրքիայի ԶՈւ-ի համագործակցությունը մեծ ներդրում կունենա ՆԱՏՕ-ի համար․ գլխավոր քարտուղար
ՆԱՏՕ-ի գլխավոր քարտուղար Յենս Ստոլտենբերգը բարձր է գնահատել ադրբեջանական բանակի զինծառայողների պրոֆեսիոնալիզմը խաղաղապահ առաքելություններում և այլ ոլորտներում նրանց գործունեությունը ՆԱՏՕ-ի հետ գործընկերության շրջանակներում: Այս մասին այսօր՝ մարտի 18-ին հայտարարել է ՆԱՏՕ-ի գլխավոր քարտուղարը՝ Ադրբեջանի ՊՆ, գեներալ-գնդապետ Զաքիր Հասանովի հետ հանդիպման ժամանակ։
Ստոլտենբերգը հատուկ ընդգծել է, որ ադրբեջանական բանակի սերտ համագործակցությունը Թուրքիայի զինված ուժերի հետ նույնպես մեծ ներդրում կունենա Ադրբեջանի և ՆԱՏՕ-ի հարաբերություններում:
Հասանովը ներկայացրել է երկրի ԶՈւ-ում կատարվող բարեփոխումները, խոսել ականազերծման աշխատանքների, Հայաստանի ու Ադրբեջանի սահմանին տիրող իրավիճակի մասին։ Նա խոսել է ՆԱՏՕ-ի հետ համագործակցության արդյունքում ձեռք բերված հաջողությունների մասին և կարևորել հարաբերությունների հետագա զարգացումը։
Հաղորդվում է, որ կողմերը քննարկել են կիբերանվտանգության, ականազերծման, ինչպես նաև երկկողմ ռազմական հարաբերություններում և այլ ոլորտներում զարգացման հեռանկարները, մտքեր են փոխանակվել տարածաշրջանային անվտանգության և փոխադարձ հետաքրքրություն ներկայացնող մի շարք հարցերի շուրջ։
