Շատ մարդիկ են անհանգստանում այն բանի համար, ինչը ես կարող եմ կոտորած անվանել․ Բորել
Գազայի հատվածում պաղեստինա-իսրայելական հակամարտության սրման ֆոնին տեղի ունեցածը կոտորած է։ Այս մասին հայտարարել է Եվրամիության դիվանագիտության ղեկավար Ժոզեպ Բորելը, հաղորդում է PBS հեռուստաընկերությունը։
«Ավելի ու ավելի շատ մարդիկ են անհանգստանում այն բանի համար, ինչը ես միանշանակ կարող եմ կոտորած անվանել»,- ասել է Բորելը՝ հավելելով, որ ԱՄՆ-ում հասարակական կարծիքի փոփոխություններ են նկատվում Գազայում տեղի ունեցող իրադարձությունների նկատմամբ: Նա նշել է, որ արդեն ամբողջ աշխարհը մտահոգված է անկլավում տիրող իրավիճակով։
Նրա խոսքով՝ Եվրոպան ցանկանում է հակամարտությունը կարգավորելու միջոց գտնել երկու պետությունների համակեցության հիման վրա, ինչպես նաեւ պաղեստինցիներին սեփական կառավարություն ունենալու իրավունք տալու հիման վրա:
Գազայի բնակիչները սովամահ են լինում անհրաժեշտ հումանիտար օգնության բացակայության պատճառով, քանի որ Իսրայելը վերահսկում է սահմանը և թույլ չի տալիս պարենամթերքով բեռնված բեռնատարներ, ընդգծել է Բորելը:
Մինչ այդ հաղորդվել էր, որ ավելի քան 170 մարդ վիրավորվել է՝ կրակի տակ ընկնելով Գազայի հատվածում մարդասիրական օգնության սպասելիս:
