Բայրամովը թուրք և վրացի գործընկերների հետ քննարկել է հայ-ադրբեջանական հարաբերությունները
Ադրբեջանի և Հայաստանի միջև խաղաղության հասնելու պատմական հնարավորություն է ստեղծվել։ Այս մասին հայտարարել է Ադրբեջանի արտգործնախարար Ջեյհուն Բայրամովը՝ Բաքվում Ադրբեջանի, Թուրքիայի և Վրաստանի արտգործնախարարների 9-րդ եռակողմ հանդիպման արդյունքներով համատեղ մամուլի ասուլիսի ժամանակ։
«Ադրբեջանի և Հայաստանի միջև խաղաղության հասնելու պատմական հնարավորություն է ստեղծվել։ Խաղաղության ապահովման համար անհրաժեշտ է պահպանել միջազգային իրավունքի նորմերն ու սկզբունքները։ Միջազգային հանրությունը նույնպես պետք է քայլեր ձեռնարկի, որպեսզի հայկական կողմին մղի ազնիվ, բաց բանակցություններ վարել Ադրբեջանի հետ», - ասել է ադրբեջանական դիվանագիտության ղեկավարը։
Նախարարի խոսքով՝ հանդիպմանը նա գործընկերների հետ մտքեր է փոխանակել Ադրբեջանի և Հայաստանի միջև հարաբերությունների, խաղաղության հաստատման նպատակով Բաքվի կողմից ձեռնարկվող քայլերի վերաբերյալ:
