ՏԵՍԱՆՅՈՒԹ. Պուշկինի դպրոցում «աստղաբաշխական» գումարներ են հավաքում․ պարզաբանում. ArmLur

ArmLur.am-ն ահազանգ էր ստացել Երևանի Ա․ Ս․ Պուշկինի անվան թիվ 8 հիմնական դպրոցի ծնողներից, թե ավարտական դասարանների յուրաքանչյուր աշակերտից հավաքվում է «կլորիկ» գումար՝ ավարտական միջոցառումների կազմակերպան համար։

Դպրոցի տնօրեն Նատալյա Ստեփանյանը հերքել է այդ լուրը և նշել է, որ նա անձամբ զրուցել է ավարտական դասարանների ծնողների հետ և պարզաբանել է նրանց իրավունքները՝ մասնավորապես գումարային հարցերի հետ կապված։

«Մենք արդեն իսկ կանխարգելիչ միջոցառումները իրականացրել ենք, յուրաքանչյուր դասարանում անձամբ խոսել եմ ծնողների հետ, ներկայացրել եմ իրողությունը, պարզաբանել եմ բոլոր այն գործընթացները, որոնց իրավունքը նրանք ունեն՝ մասնավորապես գումարային հարցերի հետ կապված»,- ասել է տնօրենը։

Տնօրենը նաև նշել է, որ եղել են դեպքեր, երբ ընտանիքում ծնողին անհրաժեշտ է եղել գումար և ծնողը դիմել է տան անդամներին՝ ասելով, որ դպրոցը հավաքագրում է գումար։

«Դեպքեր են եղել, որ ծնողները տանը դիմել են տատիկներին կամ պապիկներին, որ դպրոցը հավաքագրում է այսքան գումար, ինչը ճիշտ չէ։ Կարծում եմ, որ յուրաքանչյուր դեպքի հետևից պետք է հետևողական գնալ»,- նշել է տնօրենը։

Մանրամասները՝ տեսանյութում։