ՌԴ-ն երկարաձգել է ԵՄ-ից, Ուկրաինայից և այլ երկրներից բեռնատարների մուտքի արգելքը

Ռուսաստանի կառավարությունը Telegram-ի իր ալիքում հայտնել է, որ Եվրամիությունից, Մեծ Բրիտանիայից, Նորվեգիայից և Ուկրաինայից Ռուսաստան բեռնատարների մուտքի արգելքը երկարաձգվել է անորոշ ժամանակով: Տեղեկությունը փոխանցում է gazeta.ru-ն։ 

Համապատասխան արգելքը սահմանվել է 2022 թվականին՝ ի պատասխան ԵՄ գործողությունների, որոնք արգելել էր ռուսական և բելառուսական համարանիշներով բեռնատարների անցումը, հիշեցրել են կառավարությունում։

Կառավարությունում նշել են, որ սահմանափակումը կգործի մինչև այն հանգամանքների վերացումը, որոնք հիմք են հանդիսացել դրա սահմանման համար:

Բացառություններ կարվեն փոստային առաքանու, դիվանագիտական փոստի և մարդասիրական օգնության փոխադրումների համար: Բացի այդ, մուտքի արգելքը չի տարածվի տեխնիկական աջակցության բեռնատարների վրա, որոնք նախատեսված են սարքավորումներ և սպորտային մեքենաներ սպորտային մրցումների անցկացման վայրեր տեղափոխելու համար: