ՀՀ-ն հստակ որոշում է կայացրել փոխել իր արտաքին քաղաքականությունը և հեռանալ Մոսկվայից․ ՆԱՏՕ-ի ներկայացուցիչ
Հարավային Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան հայտարարել է, որ Հայաստանը «հստակ որոշում է կայացրել փոխել իր արտաքին քաղաքականությունը եւ հեռանալ Մոսկվայից»:
«Մենք դա ողջունում ենք։ Հայաստանի քաղաքացիներն իրավունք ունեն ինքնուրույն որոշումներ կայացնել։ Իմ կարծիքով, Հայաստանն արդեն սկսել է մերձենալ մեզ հետ։ Նրանք պահանջում են ավելի շատ համագործակցություն, ավելի շատ քաղաքական երկխոսություն ՆԱՏՕ-ի հետ։ Մենք ողջունում ենք մեր գործընկերների այդ որոշումները, որոնք, ըստ երևույթին, նպաստում են տարածաշրջանի կայունացմանը»,- ասել է Կոլոմինան Վրաստանի առաջին հեռուստաալիքին տված հարցազրույցում։
Հյուսիսատլանտյան դաշինքի ներկայացուցիչը հայտարարել է նաեւ Հայաստանի եւ Ադրբեջանի միջեւ հարաբերությունների կարգավորման գործընթացին աջակցելու մասին, որը, նրա խոսքով, հիմնարար նշանակություն ունի Կովկասում կայունության պահպանման համար:
«Մենք մեծ աջակցություն ենք ցուցաբերել Հայաստանի և Ադրբեջանի միջև հարաբերությունների կարգավորմանը։ Մենք աջակցում ենք ԵՄ-ի, ԱՄՆ-ի, ինչպես նաև Հայաստանի և Ադրբեջանի միջև երկկողմ ձևաչափով իրականցվող հարաբերությունների կարգավորմանն ուղղված ջանքերին: Մեզ համար իսկապես հիմնարար է, որ կայունությունը պահպանվի կովկասյան տարածաշրջանում»,- ասել է նա։
