Բայդենը բանակցություններ է վարում՝ ռուսական 300մլրդ դոլարի սառեցված ակտիվները՝ Ուկրաինային օգնելու համար օգտագործելու վերաբերյալ

ԱՄՆ նախագահ Ջո Բայդենի վարչակազմը բանակցություններ է սկսել դաշնակիցների հետ՝ 300 միլիարդ դոլարի սառեցված ռուսական ակտիվներն Ուկրաինային օգնելու համար օգտագործելու վերաբերյալ, գրում է The New York Times-ը։

Սպիտակ տան աղբյուրների համաձայն՝ Բայդենի վարչակազմը ներկայումս շտապ բանակցություններ է վարում Յոթնյակի (G7) երկրների ղեկավարների հետ, որոնց ընթացքում քննարկվում են ռուսական սառեցված ակտիվները Կիև փոխանցելու ռազմավարության ասպեկտները։

NYT-ը նշում է, որ Միացյալ Նահանգները ցանկանում է հաստատել այս ռազմավարությունը մինչև 2024 թվականի փետրվարի 24-ը՝ Ուկրաինա ռուսական լայնամասշտաբ ներխուժման երկրորդ տարելիցը։

Վիճահարույց հարցերից մեկը, որը բանակցողները քննարկում են G7-ի երկրների ֆինանսների նախարարների, կենտրոնական բանկերի ղեկավարների, դիվանագետների և իրավաբանների մակարդակով, սառեցված միջոցների փոխանցման եղանակն է, նշում են հրատարակության զրուցակիցները։ Մասնավորապես, քննարկվում է ակտիվներն ուղղակիորեն Ուկրաինային փոխանցելու կամ դրանք ուկրաինական կողմի շահերին այլ կերպ օգտագործելու հնարավորությունը։

Ռազմավարության մեկ այլ վիճելի կողմ, ինչպես գրում է NYT-ն, այդ միջոցների նպատակային օգտագործումն է։ Դիտարկվում են մի քանի տարբերակներ, այդ թվում՝ սառեցված ակտիվներն ուղղել ռազմական կարիքների համար կամ միայն երկրի տնտեսությունը վերականգնելու համար։