Հայաստանը չի փորձում հեծանիվ հայտնագործել. Քերոբյանի խորհրդական

Հայաստանը պատմականորեն բարդ ժամանակներում է ապրում, բայց այսօր էլ ջանք է գործադրում՝ հաղթահարելու մարտահրավերները․ Հայաստանը հազարամյակներ առաջ է ունեցել ելք դեպի ծով, ու ծովագնացության գիտելիք մեր գենետիկայում ունենք։ Այդ մասին այսօր դեպի ծով ելք չունեցող պետությունների նախարարների հանդիպման ժամանակ ասաց ՀՀ էկոնոմիկայի նախարարի՝ «Չոր նավահանգիստ» ծրագրի գծով խորհրդական Չարլզ Մալասը։

Նրա խոսքով՝ հիմա լավագույն գաղափարներից մեկը, որ առաջ է քաշվել, «Խաղաղության խաչմերուկն» է, որը տրանսպորտային ուղիների օգտագործման միջոցով հնարավորություն կտա տարածաշրջանը փոխկապակցել։

«Վերջին ժամանակներում ականատես ենք լինում Հայաստանի ենթակառուցվածքների զարգացմանը, այստեղ ամեն ջանք գործադրում են՝ Հյուսիս-Հարավ միջանցքը գործադրելու համար»,- նշեց նա։

Ըստ բանախոսի՝ Հայաստանը չի փորձում հեծանիվ հայտնագործել, այլ ամեն բան անում է եղածը ճիշտ օգտագործելու համար։

Նա ներկայացրեց Շիրակում կառուցվող չոր նավահանգստի սխեման՝ նշելով, որ այնտեղ տրանսպորտի երեք ձևերի համար հասանելիություն կլինի՝ երկաթուղի, ինքնաթիռ և մեքենա։