Ֆրանսիան հող է նախապատրաստում մեր տարածաշրջանում նոր պատերազմների սանձազերծման համար. Իլհամ Ալիև

Ֆրանսիան խախտում է կայունությունը ոչ միայն իր նախկին և ներկա գաղութներում, այլեւ մեր տարածաշրջանում՝ Հարավային Կովկասում, որտեղ աջակցում է անջատողական միտումներին եւ անջատողականներին: Այս մասին ասվում է Ադրբեջանի նախագահի՝ «Ապագաղութացում. կանանց հզորացում և զարգացում» միջազգային համաժողովի մասնակիցներին ուղղված ուղերձում:  Հայտնում են ադրբեջանական լրատվամիջոցները։ 

«Նա վարում է ռազմատենչ քաղաքականություն՝ զինելով Հայաստանին, խրախուսում է ռևանշիստական ուժերին Հայաստանում, հող է նախապատրաստում մեր տարածաշրջանում նոր պատերազմների սանձազերծման համար։ Միևնույն ժամանակ Ֆրանսիան չարաշահում է ՄԱԿ-ի Անվտանգության խորհրդի մշտական անդամի իր կարգավիճակը իր կողմնակալ, ոչ օբյեկտիվ քաղաքականությունն իրականացնելու համար, զբաղվում է տարբեր տարածաշրջաններում աշխարհաքաղաքական ինտրիգներով, փորձում է Արևմտյան կազմակերպություններն օգտագործել որպես պետությունների դեմ ճնշման միջոց», - իր ուղերձում նշել է պետության ղեկավարը: