Սամբոյի աշխարհի առաջնությունը Հայաստանը կազմակերպվել է ամենաբարձր մակարդակով. ՖԻԱՍ-ի նախագահ Շեստակով
Հայաստանը՝ որպես հյուրընկալող երկիր, ապահովել է բոլոր պայմանները սամբոյի մրցումները պատշաճ անցկացնելու համար։
ՀՀ կրթության, գիտության, մշակույթի և սպորտի նախարար Ժաննա Անդրեասյանի հետ հանդիպմանն այդ մասին ասել է սամբոյի միջազգային ֆեդերացիայի (ՖԻԱՍ) նախագահ Վասիլի Շեստակովը։ Տեղեկությունը հայտնում է ՀՀ ԿԳՄՍՆ մամուլի ծառայությունը։
«Սամբոյի աշխարհի առաջնությունը կազմակերպվել է ամենաբարձր մակարդակով, ինչի համար շատ շնորհակալ ենք: Իսկապես գնահատում ենք Հայաստանի կառավարության, ԿԳՄՍ նախարարության և Հայաստանի սամբոյի ֆեդերացիայի ջանքերն այդ հարցում: Սա մեծ տոն է թե՛ Սամբոյի միջազգային ֆեդերացիայի, և թե՛ Հայաստանի սպորտային հասարակության համար: Ուրախ ենք, որ 70 երկրի մասնակցություն է ապահովված աշխարհի այս առաջնությունում»,– նշել է Վասիլի Շեստակովը:
Մասնավորապես, ՀՀ կառավարությունը վերջերս ընդունել է որոշում, ըստ որի` պետական հոգածության ներքո օժանդակելու է նաև հավաքականների կազմում բարձր արդյունքներ ցուցաբերած սամբիստ մարզիկներին ու նրանց մարզիչներին՝ գալիք տարվանից ամենամսյա անվանական թոշակ տրամադրելով (ցմահ):
Նախարար Անդրեասյանը նաև ընդգծել է, որ աշխարհի առաջնությանը Փախստականների հավաքականի կազմում ՖԻԱՍ–ի դրոշի ներքո հանդես են գալիս Լեռնային Ղարաբաղից բռնի տեղահանված 3 մարզիկ՝ Դավիթ Հովսեփյանը (58 կգ), Արսեն Կարապետյանը (79 կգ) և Արմեն Մնացականյանը (58 կգ, մարտական սամբո):
Հիշեցնենք, որ Սամբոյի միջազգային ֆեդերացիան Երևանում օրերս կազմակերպել է նաև մրցավարական սեմինար, իսկ այսօր նախատեսված է Բիզնես ֆորումի անցկացում:
Սամբոյի աշխարհի առաջնությանն ավելի քան 70 երկրի 650 մարզիկներ են մասնակցում: Հայաստանի հավաքականներն ԱԱ–ին ներկայացված են մարզական սամբոյի, մարտական սամբոյի և կանանց սամբոյի մրցումներում՝ բոլոր քաշային կարգերում:
