Բլինքենը վստահ է, որ Իսրայելը և Գազայի հատվածը չեն կարողանա վերադառնալ ստատուս քվոյին

ԱՄՆ պետքարտուղար Էնթոնի Բլինքենը վստահ է, որ Իսրայելը և Գազայի հատվածը չեն կարողանա վերադառնալ ստատուս քվոյին, անհրաժեշտ է գտնել նոր մեխանիզմ, որը թույլ կտա Իսրայելին խուսափել ՀԱՄԱՍ-ի կողմից կրկնվող հարձակումներից։ 

Պետքարտուղարին NBC հեռուստաալիքով հարցրել են, թե որն է Իսրայելի ռազմավարությունը Գազայի հատվածի նկատմամբ և ով է կառավարելու այն, երբ հակամարտությունն ավարտվի։ 

«Կարծում եմ՝ մենք հասկանում ենք երկու բան՝ մենք չենք կարող վերադառնալ ստատուս քվոյին, նրանք չեն կարող վերադառնալ այն ստատուս քվոյին, որտեղ ՀԱՄԱՍ-ը կկարողանա կրկնել այն, ինչ արեց», - ասել է Բլինքենը: 

«Պետք է ինչ-որ նոր բան գտնել»,- հավելել է նա՝ ընդգծելով, որ, իր տեղեկություններով, Իսրայելը մտադիր չէ վերահսկողության տակ առնել Գազայի հատվածը։