ՏԵՍԱՆՅՈՒԹ․ Վազգեն Թևանյանը հաղթել է ադրբեջանցի ըմբիշին
Սերբիայի մայրաքաղաք Բելգրադում անցկացվող ազատ ոճի ըմբշամարտի աշխարհի առաջնությունում (օլիմպիական վարկանիշային) 65 կգ քաշային կարգում Հայաստանի ներկայացուցիչ Վազգեն Թևանյանը ադրբեջանցի մրցակցի նկատմամբ հաղթանակով դուրս եկավ կիսաեզրափակիչ:
Եվրոպայի գործող չեմպիոնը քառորդ եզրափակիչում մրցեց Ադրբեջանի ներկայացուցիչ Հաջի Ալիևին և տպավորիչ հաղթանակ տարավ 12:2 հաշվով:
Թևանյանը պայքարը սկսել է 1/16 եզրափակիչից, որտեղ 9:0 հաշվով վստահ հաղթանակ է տարել չեզոք երկրի դրոշի ներքո հանդես եկող բելառուս Նուրգյուն Սկրիաբինի նկատմամբ:1/8 եզրափակիչում Վազգեն Թևանյանը գոտեմարտեց Տաջիկստանի ներկայացուցիչ Աբդուլմաժիդ Կուդիևի հետ և լարված պայքարում հաղթեց 8:6 հաշվով:
Երեկոյան մրցահերթում բրոնզե մեդալի գոտեմարտ կանցկացնի աշխարհի կրկնակի բրոնզե մեդալակիր, Եվրոպայի եռակի չեմպիոն Արսեն Հարությունյանը:
Երրորդ մրցումային օրը պայքարի մեջ մտած Հայաստանի վերջին ներկայացուցիչ Սերգեյ Սարգսյանը մեկ հաղթանակ տանելուց հետո պարտվել է 1/16 եզրափակիչում:
Նշենք, որ աշխարհի առաջնությունը ըմբիշների առաջին օլիմպիական վարկանիշային մրցաշարն է: Յուրաքանչյուր օլիմպիական քաշային կարգում խաղարկվում է 5 ուղեգիր: 4 մեդալակիրները և բրոնզե մեդալի համար գոտեմարտում պարտված 2 ըմբիշներից մեկը. նրանց միջև կանցկացվի լրացուցիչ գոտեմարտ:
Ազատ ոճի ըմբշամարտի աշխարհի առաջնությունը կավարտվի սեպտեմբերի 19-ին:
