«ՆԱՏՕ-ի հետ մերձեցումը դժվար թե որևէ մեկի համար դրական արդյունքների բերի»․ Մոսկվան՝ ՀՀ-ին
Հայ ժողովուրդը բավական իմաստուն է և հեռատես, որպեսզի խուսափի հակառուսական և հակահայկական սադրանքներից։ Նման դիրքորոշում է հայտնել Ռուսաստանի արտաքին գործերի նախարարի տեղակալ Միխայիլ Գալուզինը, փոխանցում է ՏԱՍՍ-ը։
Նրա խոսքով, Հայաստանի բնակչությունը բավականաչափ «օբյեկտիվ ըմբռնում է ժամանակակից միջազգային իրողությունները», որպեսզի չգնա ՆԱՏՕ-ի` ազդեցության գոտի ներքաշվելու ցանկությանը:
Գալուզինն ընդգծել է, որ «Մոսկվան ոչ մեկին ոչինչ չի թելադրում», սակայն գործընկերների ուշադրությունը հրավիրում է այն փաստի վրա, որ ՆԱՏՕ-ի հետ մերձեցումը դժվար թե որևէ մեկի համար դրական արդյունքների բերի։
«Վստահ եմ, որ հայ ժողովուրդը, հայ հասարակությունը հիանալի հասկանում է ամեն ինչ և ճիշտ հետևություններ կանի, որոնք կբավարարեն Հայաստանի երկարաժամկետ անվտանգության շահերը»,- ասել է նա։
Ավելի վաղ հայտնի էր դարձել, որ Հայաստանն ու ԱՄՆ-ն համատեղ զորավարժություններ են անցկացնելու։ Դրանցում հայկական բանակը պետք է փորձի փոխանակում կատարի հրամանատարության և մարտավարական հաղորդակցության ոլորտում, ինչպես նաև բարձրացնի գնահատման պատրաստակամությունը՝ համաձայն ՆԱՏՕ-ի օպերատիվ կարողությունների հայեցակարգի:
