ՏԵՍԱՆՅՈՒԹ. Փաշինյանը ստեղծված իրավիճակի ելքը տեսնում է Բաքու-Ստեփանակերտ երկխոսության միջոցով

«Ադրբեջանը ՌԴ խաղաղապահ զորախմբի ներկայությամբ շարունակում է ԼՂ ժողովրդին սովահարության միջոցով ցեղասպանության ենթարկելու քաղաքականությունը։ Այդ քաղաքականության հիմնական նպատակն է ԼՂ տարածքն ազատել հայերից»,- հայտարարել է ՀՀ վարչապետ Նիկոլ Փաշինյանը։

Նա հիշեցրել է, որ այս հրեշավոր ծրագրի զարգացման սցենարներից մեկն էլ հետևյալն է. «Ադրբեջանը պլանավորում է հումանիտար ճգնաժամի ամենասուր կամ առավել սուր հատվածում միակողմանի բացել Լաչինի միջանցքը, ԼՂ-ից թույլատրել մարդկանց ելքը և թույլ չտալ վերադարձը։ Ցեղասպանության և հայրենազրկման այս քաղաքականությունը տեղի է ունենում 21-րդ դարում՝ միջազգային հանրության աչքի առաջ»։

Վարչապետը նշել է, որ ստեղծված իրավիճակի ելքը տեսնում է Բաքու-Ստեփանակերտ երկխոսության միջոցով. «Հարկ եմ համարում ընդգծել, որ միջազգային մեխանիզմը տվյալ իրավիճակում կենսականորեն անհրաժեշտ է, հակառակ դեպքում, ինչպես համոզվել ենք, Բաքուն բոլոր հնարավոր միջոցներով վիժեցնում է երկխոսության հնարավորությունը»։

Նա կարևորել է ԼՂ-ում հաստատված հումանիտար ճգնաժամի վրա միջազգային ուշադրությունը կենտրոնացնելու ջանքերը՝ հիմք ընդունելով Արդարադատության միջազգային դատարանի վճիռները։ «Մենք պետք է անհոգնել առաջ մղենք Լաչինի միջանցք և ԼՂ միջազգային փաստահավաք առաքելություն գործուղելու գաղափարը, որովհետև հատկապես հիմա դա բացարձակ անհրաժեշտություն է:

Իհարկե, բոլոր առումներով առաջնահերթություն և առաջնային խնդիրը մնում է ԼՂ հրատապ, րոպե առաջ հումանիտար բեռների հասցեագրումը և նրանց մուտքի հնարավորության ապահովումը»,- ասել է նա։