Ողջունում ենք ցանկացած նախաձեռնություն, որը չի հակասում ՌԴ ջանքերին․ Զախարովան՝ Մակրոնի հայտարարությունների մասին

Մոսկվան ողջունում է ցանկացած նախաձեռնություն, որը չի հակասում Հայաստանի և Ադրբեջանի հարաբերությունների կարգավորմանն ուղղված Ռուսաստանի ջանքերին, չի կրկնօրինակում և չի խաթարում դրանք։ Այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Ֆրանսիայի նախագահ Էմանուել Մակրոնի հայտարարությունը։

«Մյուս կողմից, հայտնի է Ֆրանսիայի գործունեությունը այս ոլորտում։ Նման միջնորդական ջանքերի շրջանակներում անհրաժեշտ է հաշվի առնել հակամարտության երկու կողմերի՝ և՛ Հայաստանի, և՛ Ադրբեջանի դիրքորոշումը։ Առանց հակամարտության երկու կողմերի դիրքորոշումները հաշվի առնելու, չարժե հույս դնել իրավիճակում առաջընթաց ունենալու վրա, որն առանց այդ էլ բավականաչափ թեժ է»,- ասել է Զախարովան։

Հիշեցնենք՝ ավելի վաղ Ֆրանսիայի նախագահ Էմանուել Մակրոնը հայտարարել էր, որ բանակցություններ կվարի Հայաստանի և Ադրբեջանի ղեկավարների հետ և հանդես կգա Լեռնային Ղարաբաղի հակամարտության կարգավորման նոր դիվանագիտական նախաձեռնությամբ: