«Սա ստամոքսի պայքար չէ». Ակցիայի մասնակիցները՝ Արցախի նախագահին

Ստեփանակերտի Վերածննդի հրապարակում մարդիկ հինգ ժամից ավելի սպասել են Ազգային ժողովում ընթացող ընդլայնված խորհրդակցության ավարտին։ Այս մասին իր ֆեյսբուքյան էջում գրել է արցախցի լրագրող Տաթևիկ Աղաջանյանը՝ կիսվելով որոշ մանրամասներով։

Աղաջանյանի խոսքով՝ երկար ձգձգումներից, խորհրդարանի մուտքը հսկող ոոտիկանների հետ հրմշտոցից հետո ներկաների առաջ է դուրս եկել ԱՀ նախագահ Արայիկ Հարությունյանը։

«Նախ ասաց, որ ապօրինի անցակետից տարված պատանիների հարցով բարի լուր ունի, որը կհայտնի վաղը առավոտ ծնողներին։

Հետո փորձեց հացի խնդրի մասին խոսել, ներկաներն ասացին, որ սա ստամոքսի պայքար չէ։ Ասաց, որ դիտարկում են միայն մի ճանապարհ` Լաչինի միջանցքը։ Մի պահ բարձրախոսին մոտեցավ Տիգրան Պետրոսյանը, բայց ներկաների սուլոցներից հետո նա հեռացավ։

Հետո Ա. Հարությունյանը ասաց, որ մի քանի օր առաջ ուզու մ էր հրաժարական տալ, հիմա էլ պատրաստ է դրան, կարող է դառնալ սովորական զինվոր։ Բայց ճանապարհի բացման ժամկետների ու այլ հարցերի կոնկրետ պատասխան չլսեցի»,- գրել է Աղաջանյանը։

Հիշեցնենք՝ երեկ երեկոյան արցախցիները հավաքվել են Ստեփանակերտի հրապարակում և փորձում էին իրենց հարցերի պատասխանը ստանալ Արցախի Հանրապետության նախագահ Արայիկ Հարությունյանից։