Մի կին վնասել է ՔՊ կուսակցության պաստառը և անպարկեշտ գրառում արել․ ՔԿ

57-ամյա մի կին օգոստոսի 27-ին ներկանյութով դիտավորությամբ վնասել է Երևան քաղաքի Միկոյան փողոցում գտնվող շենքերից մեկի հարակից կանգառում փակցված «Քաղաքացիական պայմանագիր» կուսակցության պաստառը և դրա վրա կատարել անպարկեշտ գրառում: Այս մասին հայտնում է ՀՀ քննչական կոմիտեն։

Նախաքննության ընթացքում 57-ամյա կինը ձերբակալվել և ներկայացվել վարույթն իրականացնող մարմնին, տվել ինքնախոստովանական ցուցմունք: Նա ազատ է արձակվել։ Իրականացվում է քննություն՝ պարզելու Երևանի քաղաքապետի թեկնածուներից մեկի պաստառը վնասելու դեպքի հանգամանքները:

Դեպքի առթիվ ՀՀ քրեական օրենսգրքի 264-րդ հոդվածի 1-ին մասով (գույքը ոչնչացնելը կամ վնասելը, որը խոշոր չափերի գույքային վնաս է պատճառել) նախաձեռնվել է քրեական վարույթ։

Կուսակցությունը ճանաչվել է տուժող: Նախաքննությունը շարունակվում է: