Լիբիան վստահեցրել է Պաղեստինին, որ չի պատրաստվում վերականգնել հարաբերությունները Իսրայելի հետ
Լիբիայի Ազգային միասնության կառավարության ղեկավար Աբդել Համիդ Դբեյբան այցելել է Տրիպոլիում Պաղեստինի դեսպանատուն և դիվանագետներին վստահեցրել, որ չի պատրաստվում վերականգնել հարաբերությունները Իսրայելի հետ։ Այս մասին հայտնում է Libya Al Ahrar հեռուստաալիքը։
Նշվում է, որ դիվանագիտական առաքելության ժամանակ Դբեյբան «հաստատել է, որ Լիբիան Իսրայելի հետ հարաբերությունները կարգավորելու ծրագիր չունի»՝ անցյալ շաբաթ Ազգային միասնության կառավարության արտգործնախարար Նաջլա Մանգուշի և իր իսրայելցի գործընկեր Էլի Քոհենի հանդիպման ֆոնին:
Ավելի վաղ Մանգուշի գրասենյակը հայտարարություն էր տարածել, որ այս հանդիպումը արտոնված է Դբեյբայի կողմից։
Ըստ Al Wasat պորտալի՝ ԱԳ նախարարի գործողությունները, ով հանդիպել է իր իսրայելցի գործընկեր Էլի Քոհենի հետ, խախտել է 1957 թվականին ընդունված «Իսրայելի բոյկոտի մասին» թիվ 62 օրենքը, որի յոթերորդ հոդվածը նախատեսում է «ազատազրկում 3-ից 10 տարի ժամկետով և մինչև 5000 լիբիական դինար (մոտ 1000 դոլար) տուգանք»։
Կիրակի Դբեյբան պաշտոնանկ արեց արտաքին գործերի և միջազգային համագործակցության նախարար Նաջլա Մանգուշին՝ իր իսրայելցի գործընկերոջ հետ հանդիպման պատճառով: ԱԳՆ ղեկավարի նկատմամբ հետաքննություն է սկսվել:
Ըստ Yedioth Ahronoth թերթի, Քոհենը գաղտնի հանդիպել է Մանգուշի հետ անցյալ շաբաթ Հռոմում՝ Իտալիայի արտգործնախարար Անտոնիո Տայանիի աջակցությամբ։ Սրանք Իսրայելի և Լիբիայի արտաքին գործերի նախարարների առաջին բանակցություններն էին։ Երկու երկրների արտգործնախարարների վերջին հանդիպման մասին հայտարարությունների ֆոնին Լիբիայում փոքր բողոքի ակցիաներ են տեղի ունեցել։
