ՏԵՍԱՆՅՈՒԹ. «Ծրագրեր են մշակվում Լաչինի միջանցքը միակողմանիորեն բացելու ուղղությամբ». Փաշինյան

Հայաստանի վարչապետ Նիկոլ Փաշինյանը կառավարության նիստի մեկնարկին անդրադարձել է Լաչինի միջանցքի շրջափակմանն ու ԼՂ-ում հումանիտար վիճակին․

«Իրադրության միակ փոփոխությունն այն է, որ «Կարմիր խաչի» և ԼՂ-ում ՌԴ խաղաղապահ զորախմբի միջոցով բուժման կարիք ունեցող և այլ քաղաքացիների որոշակի շարժ է սկսվել Լաչինի միջանցքով»,- ասել է նա։

Ըստ Փաշինյանի՝ միևնույն ժամանակ հավաստի տեղեկություններ են հասել, թե ծրագրեր են մշակվում Լաչինի միջանցքը միակողմանիորեն բացելու, այսինքն՝ ԼՂ-ից ելք թույլ տալու, փոխարենը՝ մուտքը թույլ չտալու ուղղությամբ։

Նիկոլ Փաշինյանը հիշեցրել է, որ Հայաստանում ԼՂ բազմաթիվ բնակիչներ կան, որոնք չեն կարող վերադառնալ. «Նրանցից շուրջ 5 հազարն այստեղ են նախորդ տարվա դեկտեմբերից ի վեր Լաչինի միջանցքի փակ լինելու հետևանքով, ևս շուրջ 30 հազարը՝ 2020թ. նոյեմբերի 9-ի եռակողմ հայտարարության 7-րդ կետի չկատարման հետևանքով։ Հիշեցնեմ, որ 2020թ. նոյեմբերի 9-ի եռակողմ հայտարարության 7-րդ կետն ազդարարում է՝ «ներքին տեղահանված անձինք և փախստականները վերադառնում են Լեռնային Ղարաբաղի տարածք և հարակից շրջաններ՝ ՄԱԿ-ի փախստականների հարցերով գերագույն հանձնակատարի գրասենյակի վերահսկողության ներքո»:

Այս դրույթի չկատարումը և մյուս փաստերը շարունակաբար վկայում են, որ Ադրբեջանի հիմնական նպատակը ԼՂ հայության էթնիկ զտման ճանապարհով հայությանը Ղարաբաղից հեռացնելն է»։