Անվտանգության խորհրդի նիստ Արցախում տեղի չի ունեցել․ ԱՀ նախագահի մամուլի խոսնակ

Լուրերը, թե Արցախի նախագահ Արայիկ Հարությունյանը երեկ Անվտանգության խորհրդի նիստում տեղեկացրել է, թե Աղդամի ճանապարհով առևտուր անելու որոշում է կայացվել,  չեն համապատասխանում իրականությանը: 

Արայիկ Հարությունյանի մամուլի խոսնակ Լուսինե Ավանեսյանը հայտնել է, որ Արցախի Հանրապետության Անվտանգության խորհրդի նիստ տեղի չի ունեցել։ Այլ հարցերի վերաբերյալ նա տեղեկություններ չի փոխանցել։

Հավելենք, որ հայկական մամուլն այսօր գրում էր, թե Արցախի նախագահ Արայիկ Հարությունյանն Անվտանգության խորհրդի նիստում երեկ տեղեկացրել է, թե որոշում է կայացվել Աղդամի ճանապարհով առևտուր անելու: Մամուլի հրապարակումների համաձայն՝ առևտուրն այդ ճանապարհով լինելու է մասնակի, այնտեղով կմտնեն շինանյութ, դիզելային վառելիք, դեղորայք, իսկ սնունդը կներկրվի Լաչինով՝ ռուս խաղաղապահների միջոցով։