ԱՄՆ–ն՝ Նիգերում ռազմական միջամտության մասին

Ամերիկյան իշխանությունները Նիգերում ռազմական միջամտությունը համարում են վերջին միջոց՝ իրավիճակը դիվանագիտական ​​ճանապարհով կարգավորելու բոլոր փորձերից հետո։ Այս մասին ճեպազրույցում հայտարարել է Պետդեպարտամենտի մամուլի ծառայության ղեկավարի տեղակալ Վեդանտ Պատելը։ 

«ECOWAS-ը (Արևմտյան Աֆրիկայի երկրների տնտեսական համայնք) հստակ նշել է, որ ռազմական միջամտությունը պետք է լինի վերջին միջոցը», - ասել է Պատելը: 

Նա մանրամասնել է, որ Վաշինգտոնը կենտրոնացած է դիվանագիտական ​​լուծման հասնելու վրա։ Պետքարտուղարության խոսնակն ընդգծել է, որ Միացյալ Նահանգները սերտ կապի մեջ է ECOWAS-ի հետ և ձգտում է իրավիճակի խաղաղ կարգավորմանը։ 

Le Figaro թերթի տվյալներով՝ այժմ Նիգերում մոտ 1300 ամերիկացի զինվորական կա։ Զինվորները կենտրոնացած են երկրի հյուսիսային մասում գտնվող Նիամի և Ագադեսի հենակետերում: Ագադեսի բազան ԱՄՆ-ի համար ռազմավարական նշանակություն ունի, քանի որ այնտեղ տեղակայված է անօդաչու թռչող սարքերի թռիչքուղի և Հյուսիսարևմտյան Աֆրիկայի դիտորդական կենտրոն: