Ավտոբուսում ուշագնացության դեպքեր են եղել. Աջափնյակում գազատարի կառուցումը մեծ խցանումներ է առաջացնում․ ԶԼՄ

Հաղթանակի կամրջից մինչև Լենինգրադյան փողոցն ընկած հատվածում երեկ՝ օգոստոսի 7-ին, 19։00-ից 21։00-ն ընկած ժամանակահատվածում մեծ խցանում է ստեղծվել։ NEWS.am-ին ահազանգած քաղաքացին պատմել է, որ պատճառը գազատար խողովակի հետ կապված շինարարությունն է եղել։

Ինքն այդ ժամանակ եղել է 26 համարի ավտոբուսում, ջերմաստիճանը եղել է +38 աստիճան, օդորակիչ չի եղել, ավտոբուսում եղել են մեծ թվով մարդիկ, ինչն ավելի շատ անհարմարություններ է ստեղծել քաղաքացիների համար։

«Սկզբում մի երիտասարդ աղջիկ ուշագնաց եղավ։ Խնդրում էինք դուռը բացել, վարորդը չէր բացում՝ պատճառաբանելով՝ կտուգանեն, այդպես վեճ սկսվեց վարորդի և տարեց ուղևորի միջև։ Ի վերջո, դուրս եկա ավտոբուսից, մի քանի կանգառ հետո՝ Լենինգրադյան-Սեբաստիա խաչմերուկում, խցանումը վերացել էր։ Նորից նստեցի այդ ավտոբուսը։ Այդ ժամանակ էլ մի պատանի ուշագնաց եղավ, վարորդն էլ հրաժարվում էր կանգառից դուրս արգելակել»,- նշել է զրուցակիցը։

Երևանի քաղաքապետի մամուլի խոսնակ Հայկ Կոստանյանը լրատվամիջոցի հետ զրույցում ասել է, որ խցանման պատճառ դարձած շինարարությունը վերաբերում է Աջափնյակ վարչական շրջանում նոր գազատարի կառուցմանը։ Ավարտը նախանշված է սեպտեմբերին։

«Քանի որ աշխատանքի ծավալը մեծ է, այդ գազատարին սպասող մարդկանց թիվը՝ ևս, չենք կարող մարդկանց երկար ժամանակ սպասեցնել, դրա համար ամենօրյա ռեժիմով է կազմակերպվում աշխատանքը, որ հետո նաև ասֆալտապատում իրականացվի, և հանձնվի շահագործման։ Հասկանում ենք քաղաքացիների անհարմարությունները, բայց պետք է գործենք հնարավորինս արագ»,- ասել է Կոստանյանը։