Թաթարստանում ուսանողներին ստիպում են «Շահեդ» անօդաչու սարքեր հավաքել։ Այս մասին գրում է DW-ն։
 

Ուսանողների պատմությունների համաձայն՝ նրանցից մի քանի հարյուրը ներգրավված են իրանական անօդաչու թռչող սարքերի հավաքման մեջ, իսկ Ալաբուգայի պոլիտեխնիկական քոլեջի մնացած նախագծերն աստիճանաբար դուրս են մղվում։
 

Ինչպես նշվում է «Протокол»-ի և «РЗВРТ» յութուբյան ալիքի համատեղ հետաքննության մեջ՝ Թաթարստանի Ալաբուգա հատուկ տնտեսական գոտու Ալաբուգա պոլիտեխնիկական քոլեջի անչափահաս ուսանողները ներգրավված են Shahed անօդաչու թռչող սարքերի հավաքման մեջ, այդ թվում՝ նրանց սպառնում են տուգանքներով և աշխատանքից հրաժարվելու դեպքում հեռացումով: Ըստ հետաքննության՝ խոսքը  15-ից 17 տարեկան դեռահասների մասին է, ովքեր քոլեջ են ընդունվել դպրոցի 9-րդ դասարանից հետո։ Նշվում է, որ կամիկաձեների հավաքման գործում ներգրավված են Ալաբուգայի պոլիտեխնիկական քոլեջի մոտ 1000 ուսանողներից մի քանի հարյուրը։

Աշխատանքի դիմաց ուսանողները ստանում են ամսական 30-40 հազար ռուբլի, հաճախ ստիպված են լինում առանց ընդմիջումների աշխատել։ Բացի այդ, ուսանողները չեն կարող բացահայտել տեղեկատվություն արտադրության մասին․ նրանց կարող է սպառնալ 1,5-2 միլիոն ռուբլի տուգանք, գրում են հետաքննության հեղինակները։

Մեկ այլ ուսանողի խոսքով էլ՝ բոլոր նրանցից, որոնք անօդաչու թռչող սարքերի արտադրությամբ են զբաղվում, Ալաբուգայի անվտանգության ծառայությունն աշխատանքը սկսելուց առաջ վերցնում է հեռախոսները, զննում նամակագրությունը, որի «պատճառով բազմաթիվ հեռացումներ են եղել տեղեկատվության տարածման համար»։ 

«Ալաբուգա պոլիտեխնիկ» քոլեջը հիմնադրվել է 2021 թվականին։ Դրա գլխավոր տնօրենը Թաթարստանի Պետական ​​խորհրդի պատգամավոր Թիմուր Շագիվալեևն է