ՆԱՏՕ-ին Ուկրաինայի անդամակցության հարցը չպետք է քննարկվի դաշինքի հուլիսին կայանալիք գագաթնաժողովում, Օսլոյում ՆԱՏՕ-ի ԱԳ նախարարների հանդիպման արդյունքներով հայտարարել է Հունգարիայի արտաքին գործերի նախարար Պետեր Սիյարտոն։ Այս մասին գրում է ՌԻԱ Նովոստին: 

«Պատերազմող երկրի անդամակցությունը ՆԱՏՕ-ին չի կարող օրակարգում ներառվել, կարծում եմ, որ փակ շրջանակում կա համաձայնություն, որ պատերազմող երկրին չի կարելի ընդունել»,- ասել է Հունգարիայի դիվանագիտության ղեկավարը։ 

Նա հորդորել է ոչ մեկին չխաբել և ոչ մի ժամանակացույց չձևավորել հակամարտող երկրի համար։ 

«Դուք կարող եք համոզել ուկրաինացիներին, որ նրանք գագաթնաժողովում կստանան ինչ-որ ժամանակացույց ՆԱՏՕ-ին միանալու համար, բայց դա անազնիվ կլինի ուկրաինացիների նկատմամբ: Դուք չեք կարող պատրանքներ ստեղծել, որոնք ակնհայտորեն չեն իրականացվի», - ասել է Սիյարտոն: 

Նախարարն ընդգծել է, որ Բուդապեշտը անընդունելի է համարում ուկրաինացի զինվորականների պատրաստումը ՆԱՏՕ-ի դրոշի ներքո, քանի որ դաշինքը պետք է խուսափի Ռուսաստանի հետ ուղիղ բախումից։