Փաշինյան-Պուտին-Ալիև եռակողմ հանդիպումից հետո Ռուսաստանի Դաշնության փոխվարչապետ Ալեքսեյ Օվերչուկը, անդրադառնալով Հայաստանի և Ադրբեջանի միջև տեխնիկական չլուծված խնդիրների հարցին, մանրամասնել է, որ խոսքը Ադրբեջանի և Հայաստանի միջև սահմանը հատելու ընթացակարգի մասին է, թե ինչպես է իրականացվելու սահմանային ու մաքսային հսկողությունը: 

Ըստ նրա՝ սրանք տեխնիկական, բայց շատ կարևոր մանրամասներ են, և որ սա են քննարկելու փոխվարչապետերը մեկ շաբաթ հետո կայանալիք հանդիպմանը։

«Հայաստանի, Ադրբեջանի և Ռուսաստանի ղեկավարները փոխվարչապետների բանակցություններից հետո կորոշեն, թե արդյոք անհրաժեշտ է նոր հանդիպում»,- ասել է նա։

Հիշեցնենք, որ երեկ Մոսկվայում կայացել է Փաշինյան - Պուտին - Ալիև եռակողմ հանդիպում։ Ինչպես հայտնել է ՀՀ վարչապետի աշխատակազմը՝ «քննարկվել են տարածաշրջանային տրանսպորտային և տնտեսական ենթակառուցվածքների ապաշրջափակմանը վերաբերող հարցեր: Պայմանավորվածություն է ձեռք բերվել աշխատանքները շարունակել մեկ շաբաթից՝ երեք երկրների փոխվարչապետների հանդիպման շրջանակում»: