Երևանի կոնյակի գործարանը դադարեցնելու է արտահանումները դեպի Ռուսաստան․ Քերոբյան

Երևանի կոնյակի գործարանը դադարեցնելու է արտահանումները դեպի Ռուսաստան։ Այս մասին ԱԺ ֆինանսավարկային և բյուջետային, տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության ու տնտեսական հարցերի մշտական հանձնաժողովների համատեղ նիստի ժամանակ հայտարարել է էկոնոմիկայի նախարար Վահան Քերոբյանը։ 

Ըստ նրա` սա խնդիր է, որ ազդելու է խաղողի մթերման վրա։ 

«Մենք պետք է ընդհանուր առմամբ տեսնենք, թե ինչպիսին է միջավայրը, ինչպիսի փոփոխություններ են տեղի ունենում։ Եվ գիտեք, որ կառավարությունը կարողանում է ինչքան հնարավոր է արագ արձագանքել տեղի ունեցածին` չեմ ասի իդեալական և լավագույն ձևով, բայց անցնցում»,– ասել է Քերոբյանը։

Սվելի վաղ հայտնել էինք, որ ֆրանսիական Pernod Ricard կոնցեռնը դադարեցրել է ալկոհոլի մատակարարումը Ռուսաստան։  Կոնցեռնը հայտարարություն էր տարածել, համաձայն որի՝ դադարեցնում է իրեն պատկանող ալկոհոլային մի քանի ապրանքանիշների, այն է՝ Ararat, Chivas Regal, Absolut և Jameson-ի արտադրանքների վաճառքը Ռուսաստանում։

«Pernod Ricard-ը կարող է հաստատել, որ 2023 թվականի ապրիլի վերջին դադարեցրել է իր միջազգային ապրանքանիշերի բոլոր մատակարարումները Ռուսաստան», - նշվում է ընկերության հայտարարության մեջ։ 

Հաղորդվում է, որ մի քանի ամիս կպահանջվի, որ ընկերությունը դադարեցնի վաճառքը Ռուսաստանում։ 

Հիշեցնենք, որ ապրիլին կոնցեռնի մաս կազմող շվեդական Absolut-ը նույնպես դադարեցրել է մատակարարումները Ռուսաստանի Դաշնություն։ Ավելի վաղ ընկերությունը հայտարարել էր, որ մասամբ կվերսկսի իր արտադրանքի արտահանումը ռուսական շուկա, սակայն դա բուռն արձագանք էր առաջացրել Շվեդիայում, որին հաջորդել էր մատակարարումները դադարեցնելու որոշումը: