Արցախից ՀՀ բուժառուների տեղափոխումը հնարավոր դարձնելու համար աշխատանքներ են տարվում. Ավանեսյան
Թե Կարմիր Խաչի միջազգային կոմիտեի հետ, թե միջազգային բոլոր հարթակներում աշխատանքներ են տարվում՝ Ադրբեջանի կողմից Լաչինի միջանցքն արգելափակելու պայմաններում հնարավոր դարձնելու Արցախից Հայաստան ծանր վիճակում գտնվող բուժառուների տեղափոխումը: Լրագրողների հետ զրույցում ասել է ՀՀ առողջապահության նախարար Անահիտ Ավանեսյանը:
«Այս պահին իրականացվում է կոնսիլիումային բժշկական օգնության տրամադրում: Մեր բժիշկները կապի մեջ են, մենք էլ Արցախի առողջապահության նախարարության հետ ինտենսիվ աշխատում ենք: Անհրաժեշտ բժշկական օգնությունը պացիենտներին տրամադրվում է»,-ասաց Ավանեսյանը:
Նրա խոսքով՝ հիվանդանոցային օղակը համալրված է անհրաժեշտ բոլոր պարագաներով:
«Տարվում են նաև աշխատանքներ թե Կարմիր Խաչի հետ, թե միջազգային բոլոր հարթակներում՝ այդ տեղափոխումները հնարավոր դարձնելու»,-նշել է նախարարը:
Ավելի վաղ հայտնել էինք, որ Ադրբեջանական կողմն արգելել է առողջական ծանր վիճակում գտնվող քաղաքացիների տեղափոխումն Արցախից Հայաստան, անգամ՝ Կարմիր խաչի միջնորդությամբ:
