Աբդոլլահիանը հեռախոսազրույց է ունեցել Բայրամովի հետ. հայտնի է՝ ինչ են քննարկել
Իրանի արտգործնախարար Հոսեյն Ամիր Աբդոլլահիանը հեռախոսազրույց է ունեցել Ադրբեջանի պաշտոնակից Ջեյհուն Բայրամովի հետ: Այս մասին հայտնել են Իրանի ԱԳՆ-ից:
Նշվում է, որ պաշտոնյաները ծավալուն քննարկում են ունեցել երկկողմ հարաբերություններում զարգացումների և տարածաշրջանային խնդիրների վերաբերյալ։
Հեռախոսազրույցների ընթացքում քննարկվել են առկա խնդիրներն ու թյուրըմբռնումները և ստեղծված իրավիճակից դուրս գալու ուղիները։ Կողմերն ընդգծել են փոխադարձ հարգանքի, միմյանց տարածքային ամբողջականությունն ու ինքնիշխանությունը հարգելու անհրաժեշտությունը։
Աբդոլլահիանը նշել է, որ տարածաշրջանի երկրների միջև հակասությունները միայն թշնամիների օգտին են։ Ընդգծվել է լրատվական դաշտն ավելի շատ վերահսկելու անհրաժեշտությունը՝ ի շահ երկու երկու ժողովուրդների ու երկրների։
Հիշեցնենք՝ ավելի վաղ Ադրբեջանի արտգործնախարարությունը «կանխակալ» և «զգացմունքային» էր անվանել Իրանի ԱԳՆ մամուլի քարտուղարի արտահայտությունները: Իրանի ԱԳՆ ներկայացուցիչ Նասեր Քանանին Բաքվից իրանցի չորս դիվանագետների արտաքսումը ոչ բարեկամական քայլ էր անվանել:
