Խանդանյանը` ՀՀ ՀԱՊԿ առաքելություն ուղարկելու որոշման նախագծի մասին

Հայաստան ՀԱՊԿ առաքելություն ուղարկելու որոշման նախագիծը մշակման փուլում է, հայկական կողմը առայժմ չի տեսնում ՀԱՊԿ-ի արձանագրումը Հայաստանի ինքնիշխան տարածքի նկատմամբ Ադրբեջանի ագրեսիայի մասին։

Այս մասին ԱԺ-ում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը:

«Այս հարցը վերջին անգամ բարձր մակարդակով հրապարակայնորեն քննարկվել է մարտին, երբ Հայաստանի արտաքին գործերի նախարար Արարատ Միրզոյանը Մոսկվայում էր։ Վերահաստատում եմ, որ այդ նախագիծը մշակման փուլում է։ Հայկական կողմը պնդում է, որ նախագիծը պետք է արձանագրի Հայաստանի ինքնիշխան տարածքի նկատմամբ Ադրբեջանի ագրեսիան, քաղաքական գնահատական տրվի, որից հետո հնարավոր կլինի արդեն խոսել առաքելության տեղակայման մասին, դրա պարամետրերի մասին։ Այսինքն, առաջին հերթին ՀԱՊԿ-ը՝ որպես կառույց, պետք է արձանագրի Հայաստանի ինքնիշխան տարածքի նկատմամբ տեղի ունեցածը, այն է՝ Հայաստանի ինքնիշխան տարածքի նկատմամբ տեղի է ունեցել ագրեսիա և օկուպացվել են Հայաստանի տարածքները»,- ասաց Խանդանյանը։

Նրա խոսքով՝ հայկական կողմը այս արձանագրումը չի տեսնում, և այն տեսնելուց հետո միայն հնարավոր կլինի խոսել մնացածի մասին։