Հայտնի է՝ ինչին էին վերաբերում համացանցում հայտնված ԱՄՆ գաղտնի փաստաթղթերի մի մասը. NYT

ԱՄՆ գաղտնի փաստաթղթերի մի մասը, որոնք այս շաբաթ հայտնվեցին համացանցում, վերաբերում են Բախմուտում իրավիճակին: Այդ մասին գրում է The New York Times-ը։

Հրատարակության տվյալներով՝ փետրվարի վերջին-մարտի սկզբին թվագրված նյութերում նկարագրվում է, թե ինչպես է Ուկրաինայի հրամանատարությունը գնահատել այդ ժամանակ քաղաքում տիրող իրավիճակը։ Նրանք ԱՄՆ-ի շտաբների պետերի միացյալ ճեպազրույցներն են՝ հիմնված հետախուզության վրա և հուշում են, որ Վաշինգտոնը ուշադիր հետևում է Կիևի իշխանությունների գործողություններին, որպեսզի «հստակ պատկերացում ունենա» նրանց ռազմավարության մասին:

Թերթը մեջբերել է փաստաթղթից քաղվածք. դրանում, մասնավորապես, ասվում է, որ փետրվարի 25-ի դրությամբ ուկրաինական զորքերը Բախմուտում գործնականում շրջապատված են եղել ռուսական ուժերով, իսկ Ուկրաինայի ռազմական հետախուզության ղեկավար Կիրիլ Բուդանովը նրանց վիճակը գնահատել է որպես «աղետալի»։ Բացի այդ, նյութերում գաղտնազերծվել է նրա ծրագիրը՝ երկու շաբաթով էլիտար ստորաբաժանումներ տեղակայել քաղաքում՝ ՌԴ Զինված ուժերին հետ մղելու և մատակարարման գծերը կտրելու համար։

Հիշեցնենք՝ The New York Times-ը հայտնել էր, որ Պենտագոնը հետաքննում է սոցցանցում գաղտնի նյութերի արտահոսքը՝ կապված ուկրաինական բանակը հակահարձակման նախապատրաստելու ԱՄՆ-ի և ՆԱՏՕ-ի ծրագրերի հետ: Միևնույն ժամանակ, փորձագետները չեն բացառում, որ փաստաթղթերը կարող են լինել օտարերկրյա հետախուզական ծառայությունների ապատեղեկատվություն։