Կառավարությունը շուրջ 2,9 միլիարդ դրամ է հատկացրել` մի շարք ավտոճանապարհները հիմնանորոգելու համար

Կառավարությունը Տարածքային կառավարման և ենթակառուցվածքների նախարարությանը հատկացրեց  2 միլիարդ 865 մլն դրամ՝ մի շարք ավտոճանապարհների շինարարական աշխատանքները սկսելու և ավարտելու համար: Նախագիծը ներկայացրել է Տարածքային կառավարման և ենթակառուցվածքների նախարար Գնել Սանոսյանը։

«Նախ, ունենք 5 օբյեկտ, որոնք ավարտվել են նախորդ տարի, և, որպես կանոն, մենք այդ ընդհանուր գումարի 5 տոկոսը պահում ենք: Հանձնաժողովը վերջնական ստուգումներն իրականացնում է, օբյեկտը վերցնում ենք շահագործման, նոր 5 տոկոսը վճարում ենք: 5 օբյեկտի համար 5 տոկոսները վճարելու նպատակով ընդհանուր 210 միլիոն դրամ այս նախագծով կվճարենք:

Մյուսները 6 օբյեկտներ են, որոնցից 2-ը նախորդ տարի սկսել ենք, բայց ինչ-ինչ պատճառներով չկարողացանք ավարտել: Հիմա կշարունակենք, այս տարի կավարտենք, և այդ երկու օբյեկտի համար գումար ենք տրամադրում, ընդ որում՝ չկատարած մասի համար ենք տրամադրում: Եվ ընկերությունների համար կիրառվելու են նաև տույժեր, քանի որ 2022 թվականին պետք է ավարտեին և չեն ավարտել:

Ընդհանուր 2 միլիարդ 865 միլիոնից 2 միլիարդ 813 միլիոն-ը շինարարության կամ 5 տոկոսները վճարելու համար է, 23 միլիոնը՝ տեխնիկական հսկողության, և 29 միլիոնը՝ հեղինակային հսկողության համար»,- նշել է Գնել Սանոսյանը: