Դուման հետաձգել է ՌԴ-ում հայկական վարորդական իրավունքի ճանաչման նախագծի քննարկումը

 Պետդուման երկրորդ ընթերցմամբ քննարկման ժամանակ մինչև մարտի 21-ը հետաձգել է ՌԴ-ում ձեռնարկատիրական և աշխատանքային գործունեություն իրականացնելիս Հայաստանի քաղաքացիների վարորդական վկայականների ճանաչումը նախատեսող օրինագծի քննարկումը: Այս մասին հայտնում է ՌԻԱ Նովոստին։ 

Փաստաթուղթը նախատեսում է Ռուսաստանի Դաշնության տարածքում Հայաստանի քաղաքացիների ազգային վարորդական վկայականների ճանաչումը տրանսպորտային միջոցների վարման հետ կապված ձեռնարկատիրական և աշխատանքային գործունեություն իրականացնելիս, ասված է ՌԴ կառավարության ներկայացրած օրինագծի բացատրական գրության մեջ: 

Պալատի խոսնակ Վյաչեսլավ Վոլոդինն առաջարկել է օրինագծի քննարկման համար հրավիրել ԱԳՆ, ՆԳՆ ներկայացուցիչներին, ինչպես նաև՝ այդ հարցի քննարկման համար նախապատրաստվել ԱՊՀ գործերով կոմիտեի ներկայացուցիչներին, որոնք համագործակցում են Հայաստանի գործընկերների հետ: 
«Այս հարցը պետք է քննարկել Հայաստանի խորհրդարանի հետ մեր հաղորդակցությունների շրջանակներում... ոչինչ չի պատահի, եթե մենք քննարկումտ հետաձգենք մինչև հաջորդ շաբաթ ՝ ամսի 21-ը, ի՞նչ եք կարծում։ Առավել ևս, նաև ավելի ճիշտ կլինի, եթե մենք հարցը քննարկենք մեր գործընկերների` Հայաստանի խորհրդարանի պատգամավորների հետ»,-ասել է Վոլոդինը։ 

Նա հավելել է, որ դա լուրջ քայլ է, որն ընդգծում է երկրների միջև հարաբերությունների մակարդակը: 
«Ո՞րն է ՀՀ կառավարության ղեկավարի դիրքորոշումը։ Դրանք լուրջ որոշումներ են, մենք բացում ենք շուկան, բարելավում ենք ինքնաիրացման հնարավորությունները Հայաստանի քաղաքացիների համար, որոնք այս օրենքի ընդունումից հետո կկարողանան աշխատել ՌԴ տարածքում օգտագործելով իրենց ազգային վարորդական վկայականները»,-ասել է Պետդումայի խոսնակը։ 
Ներկայումս տրանսպորտային միջոցներ վարելու թույլտվությունը գործում է Ղրղզստանի և այն պետությունների քաղաքացինեի համար, որտեղ ամրագրված է ռուսաց լեզվի որպես պաշտոնական լեզվի օգտագործումը։