«Վերացրո՛ւ շրջափակումը»․ ՆԱՏՕ-ի նախկին գլխավոր քարտուղարը՝ Ալիևին

Լաչինի միջանցքի շրջափակումը ո՛չ մարդկային է, ոչ էլ օրինական, այս մասին լրագրողների հետ զրույցում հայտարարեց ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը։  Ըստ նրա` Արցախին հումանիտար աղետ է սպառնում։

«Մենք բախվում ենք հումանիտար ճգնաժամի, որը կարող է վերածվել հումանիտար աղետի։ Այս շրջափակումն անօրինական է։  Մի քանի շաբաթ առաջ Արդարադատության միջազգային դատարանը որոշում է կայացրել, որը պարտադրում է Ադրբեջանին ապահովել անխոչընդոտ տեղաշարժ Լաչինի միջանցքով։ Որոշումը պարտադիր է, ինչը նշանակում է, որ Ադրբեջանը պարտավոր է բացել միջանցքը ազատ տեղաշարժի համար»,- ընդգծեց ՆԱՏՕ-ի նախկին գլխավոր քարտուղարը։

Անդերս Ֆոգ Ռասմուսենը  ուղերձ է հղել Ադրբեջանի նախագահին։

«Այսօր ես հստակ ուղերձ եմ ուղարկում Ադրբեջանի նախագահ Ալիևին և ասում եմ՝ վերացրու շրջափակումը այսօր, անհապաղ»,- ասաց նա։

Հիշեցնենք, որ այսօր ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը այցելել էր Լաչինի միջանցքի սկզբնամաս։