«44-օրյա պատերազմում պարտվել ենք, որովհետև բանակում գործել է 5-րդ շարասյուն». Նիկոլ Փաշինյան

Փաշինյանն այսօր լրագրողների հետ զրույցում հայտարարեց` Հայաստանը 2018-ից մինչև 2020 թվականը ձեռք է բերել ավելի շատ զինամթերք, քան` նախորդ 10 տարին ամբողջությամբ:

Ըստ Փաշինյանի`  44-օրյա պատերազմում պարտվել ենք, որովհետև բանակում գործել է 5-րդ շարասյուն:

«Սա իմ համոզմունքն է մի շարք փաստերի վերլուծության արդյունքում, կարծում եմ`առաջիկայում այդ փաստերն այնքան հրապարակային կլինեն, որ իմ արած հայտարարությունն այդքան տարօրինակ չի թվա», - ավելացրեց նա:

Նիկոլ Փաշինյանն ասաց, թե 50-ից ավելի զինծառայողներ մեղադրվում են պետական դավաճանության մեջ:

«Ես չգիտեմ` Հայաստանում մարդ կա՞, որ մտածում է, թե այդ մարդկանց գլխին գործ են սարքել: Այսօր կալանքի տակ ունենք բարձրաստիճան զինվորականներ այլ հոդվածներով: Հիմա հողեր հանձնելու մեղադրանքով բարձրաստիճան զինվորականներ կան կալանքի տակ, բարձրաստիճան զինվորական կա, որը մեղադրվում է Շուշիի գործով, ու երբ դատարանը որոշեց, որ կալանավորի, ինձ համար զարմանալի բան տեղի ունեցավ, մեկ էլ ամենատարբեր մարդիկ միջնորդություն են ներկայացնում, որ կալանքից ազատեն: Ժողովո՛ւրդ ջան, բա դո՞ւք  չէիք ասում, որ պետք է բացահայտվի, թե ոնց է ընկել Շուշին», - ընդգծեց նա:

Վարչապետը նշեց, թե Սերժ Սարգսյանի հայտարարությունները պատիվ չեն բերում Հայաստանի նախկին ղեկավարին: